والله ماادري هذي جدتي ولا نواف التمياط

هلا والله

اسمعوا هالولد وحكايته مع جدته
يقول ابن مردااس :




قامت جدتي الفجر رايحه للحمام تتوضئ لصلاة الفجر

وكانت تقوم قبل الصلاة بساعه علشان تتهجد اخر الليل

وهذا حالها من يوم عرفتها ((( صديقته )))


ومره من المرارير كنت جاي من البر وسخ وقذر
(( نتن على قولة المصاريه ))
كلي تراب وطين
من لعب الكوره ومن الجربعه والضبضبه والتفحيط والتطعيس ((الله من الدشاره والسربته فيني))


ودخلت البيت في الليل قبل مايقومون أهلي
((وتعرفون الأهل اول مافيا ماعندهم تفاهم))
اول مايستقبلني ابوي بلي غاااز او بزبيريه منقعه بمويه وملح

وكان عندنا فله دورين ((واحد يدعي<<يهايط يعني هع))
امي وابوي واخواني فوق في الدور الثاني وجدتي تحت

نصيت حمام جدتي عشان اتروش (( اتسبح))

بدون منشفه ولاشنبو ولا صابون

دخلت وجلست في الطشت << ملابس صار
فتحت البزبوز واخذت الغضاره وجلست اصب على جسمي الرشيق واقوم اغسل شعري بشنبو جدتي الاحمر القديم الانقليزي واغسل جسمي بصابون أبو عنز واليفه السوريه

ليفت ظهري ورجليني وجلست اصارخ من الالم والوجع كني جالس اصنفر جدار


خلصت من الترويش وصار الحمام حوسه بعدي الشنبو مكبوب والصابون طالع برا ((مدري كيف))

يوم قمت من الطشت جلست ادورمنشفه مالقيت .......

لقيت جلال جدتي معلق خذته ونشفت جسمي الريان فيه


المهم طلعت ......... وتوني ابرقى فوق واسمع جدتي تدعي وتهلل وتكبر .. قامت من النوم
دخلت عليها حبيت راسها وجلست عندها شوي وبعدها طلعت لغرفتي
فتحت باب غرفتي بالمفتاح لاني اقفلها خايف احد يدخل ويفتش فيها.
واخواني بثرين وملاقيف

بتقولون ليش؟

ابقول صورة خويتي في الغرفه

واخاف يلقونها اخواني يورونها ابوي و أمي


((وأخواني مهوب ملاقيف أبد))


دخلت الغرفه

الله من الحوسه والوصاخه بس


تصدقون ما اقدر امشي في الغرفه من الملابس المرميه والكنادر المرميه والنعال والسراويل والفنايل والشرابات وكانت عندي ثلاجه صغيره لونها بني

يوم فتحتها لقيت فيها سروال وتفاحه معرومه ومويه الهناء وفيش كهرب ودفتر وجه وجه ومكره وفليت وكت كات ماكول نصه
وظاطور ميت <<شف التناقض بس..


حتى أني ما أشوف السرير من الهدوم المتراكمه عليه

لابغيت انام اجلس ربع ساعه ادور على السرير من تحت الملابس كني انقب عن بترول

لقيت السرير بعد جهداً جهيد
وتوني منسدح على سريري الدافئ الوثير

شــــوي

والا اسمع صوت زلقه وبعدها خبطه وبعدها صراخ


قحصت من السرير من الروعه

بغيت اطب مع الدريشه ضيعت الباب.



ماعاد ادري وين الباب وين الدريشه من كثر الملابس
(( كني جالس في مغسلة فندق))





نزلت بسرعه ولا القا جدتي زالقه في الحمام


واسمع فتح البيبان نازلين على صوت الصراخ

وتجمهرنا على جدتي حتي واحد من اخواني من الروعه قال عسى ما جاء السياره شي


شلنا جدتي وحطيناها على السرير

خمس دقايق والا عماتي وعماني وعيالهم وحريم عيالهم ورجال بناتهم واقاربهم عندنا



ممتلي البيت من البشريه



وعرفت ان أخوي هو اللي مكلمهم << يحب الاخبار الشينه<< هذا امي دايم تسميه غراب البين


حتي وحده من عماتي جايه بالشلحه الحمرا أم ورد

من الروعه ما امداها تلبس ملابسه جت طايره



جاء عمي الكبير قال لازم ننقلها للمستشفى


المهم راح نسيب عمي يجيب السياره عنده جمس سوبربان بني خط بيج الداخلي رصاصي نظيف ماشي 75000 ما لمسه الشاكوش <<صرت شريطي على غفله



ركبنا جدتي الجمس النظيف ولا اسمعها وهي تون تتكلم وتقول بصووت خفيف :ركبوني قدام ..



رحنا للمستشفى وحنا متجهين لطواري الشميسي

كان ورانا ثلاثين سياره كلهم اقاربنا وعمانا وعيالهم

وكانت ليلة جمعه والمنتخب فايز وكل من شافنا من الشباب لاحقنا يحسبنا موكب جالسين نشجع
وصارو الشباب يلحقونا ومطلعين اعلام المنتخب
واللي يرقص عند الاشاره واللي يفحط

لا دخلو معنا في الطواري ومعهم اعلامهم

ويوم نزلنا نزلو معنا يشجعون بالمستشفى<<ياحليلهم مع الخيل ياشقرا هع


حتى الدكتور يحسب جدتي لاعب في المنتخب


دخلو جدتي غرفة الاشاعه وشيعوها وكان نسيبنا سعد الدرهالي يشتغل في المستشفي وكان يعرف دكتور عظام ممتاز سعودي أسمه عبد الملك المسعودي استشاري

المهم كلمه الفجر .
والله ماقصر الدكتور جاء بسرعه
كشف عليها الدكتور وشاف الاشاعه وجاء عند ابوي وعماني وقال لهم الوالده فيها تمزق بالعضله وشد عضلي في الفخذ ومحتاجه عمليه الرباط الصليبي

(((( انا طليت على جدتي احسب أني جايب ماجد عبدالله مهوب جدتي)))

قال عمي لا تستعجلون على العمليه
رقدوها كم يوم في المستشفي
وكان عمي يشتغل فى الديوان
دبر لها علاج في المانيا

المهم استعدينا .......... جت مشكله الجواز .جدتي ما تبغى رجال يصورها والصور حرام ((( من زينها العجيز))
والله المصور اليماني حق ريما احلي منها

حاولنا لكن دون جدوي
المهم وحده من بنات عمتي قالت انااوديها لمصوره نسائيه تعرفها .. بس ما يصورون صور جواز. يصورون حفلات عروس ......... الخ
المهم حاولت لين صورناها .......... اول مره اشوف صورة جواز خلفيتها ورد ودببه وخيول ونياق


المهم

جبنا واسطه لمدير الجوازات قبل الصور المهم خلصنا الجوازات والتأشيرات

بس ما لقينا حجز على الخطوط السعوديه كالعاده
حجزنا على الخطوط اللامانيه (( لفت هانزا))
كانت الرحله الساعه ثنتين اخر الليل

بغت تروح الرحله العجوز جالسه تصلي وتتهجد..

لحقنا على الرحله اخيرا


عمي لابس بدله وزبيريه

وابوي فنيله كـت وكرفته وغيرها بدع

المهم ركبنا الطياره وكان معنا حوالي ثلاث الاف شخص يودعونا من اقاربنا

جدتي وأمي درجه اولى


وابوي وعماني وأنا سياحي

اقلعت الطياره

شوي اعلنو عن فك الحزام عطونا عصير واشياء خفيفه ويوم تعدو

الأجواء السعوديه بدو يوزعون القوارير والبيره
رحت اشوف جدتي لقيتها ضايق صدرها جاء ابوي وعمي وجلسو عندها
جاء المضيف قال ارجعو لأماكنكم بنوزع الاكل
رجعنا سكر الستاره اللي بينا وبين الدرجه الاولى
جلسنا ساعه الاأمي جايه قالت تعالو شوفو أمكم تسب وتلعن فيني تغيرت الاخلاق

رحنا مسرعين لقينا معها كأس نبيذ احمر
تحسبه توت ((فيمتو يعني هههه))

سكرت جدتي جلست تسب أمي وتقول انا اكرهك من يوم خذتي ولدي انا ماعمري حبيتك من اربعين سنه

اخذنا منها الكاس عقب ماشربت الباقي

وصارت نشيطه كل ساعه جايه لنا في السياحي تخمخمنا وتحبحبنا وتعطينا فلوووس

زانت الأخلاق اول لو ابغى ذنب ماعطتني بلا والله من القعاطه اللي في راسها

المهم جت أمي عندنا في السياحي وراح عمي عندها

بس كل ساعه جايه تحارش أمي

والتفت على أمي واقول لاتهمك سكرانه

شوي واسمع صوت جدتي جالسه تهيجن وتغني ((( اتونس بيك وانت معاي))


واروح اشوفها والقاها فاكه المنيخل ومطلعه الفرقه
((فرقة الراس مو فرقت الطق ))

وحاطه الشيله على كتوفها وتسولف معالي جنبها وهاتك ياضحك وكركره المشكله انه الماني بس سكارى ويفهمون على بعض



قبل ما نوصل لمطار فرانكفورت نامت (( الحمد لله))


لاان فيه ناس بيستقبلونا من السفاره

وش بيقولون جايبين وحده سكرانه

كانت واقفه سيارة الاسعاف عند البوابه
نقلنا جدتي للمستشفي وكان معنا ناس من السفاره
قبل ما نوصل للمستشفي قامت جدتي

قمت عطيتها حلاو بولو عشان الريحه تعرفون


وصلنا للمستشفى دخلنها سووى جميع الاجرأت

والعمليه بكره....... المهم قامت جدتي ورأسها يوجعها (هنق اووفر))




جت أمي مرافقه معها وكانت خايفه أمي ((ههه صارت جدتي تروع))



عرفت ان اللي لعب براس جدتي النبيذ الاحمر

المهم سوت العمليه ((نواف التمياط))

والحمد لله تكللت بالنجاح


ويوم جاء وقت الرجعه قال عمي احجزو على الخطوط السعوديه باي ثمن ....

خايف تسكر علينا وتفضحنا

والسعوديه ما فيها مزح

والله ان يسجنونها ويسون لها اختبار استشمام

حتى العيال يوم وصلنا للرياض جلسو يشرووون علي يقولون شوفو اللي جدته تسكر

جلسنا بعد وصولنا للرياض حوالي اسبوعين سمعت جدتي تناديني :

وليدي بعد عمري ماتعرف بياع..!

اشوى اللي ماطلبت بناات
*********


ياشين السكار يقلب هامة الراس .

المهم كلن يراااقب جدته وامه الدنيا صارت تخوووف هههههههههه